小熊学捉鱼
沪语朗读：文心
朗读者
小熊学捉鱼
美国童话
改编：文心
文字修正：丁迪蒙
朗读：文心
熊妈妈带小熊到河浜旁边去，去教小熊捉鱼。勒河个边边头，小熊就晓得白相水。勿去学捉鱼个本领。熊妈妈讲：“侬勿要再去白相水唻！侬必须要学会自家捉鱼吃。”
但是啊，小熊还是勒白相水：“哈哈！冷天介个水好白相，忒好白相唻！”
熊妈妈老生气个。伊一把头拿小熊捉牢。拿伊从水里向拖出来，拖到河边浪。伊个声音老老大：“鱼侪拨侬吓的逃脱了呀！”
小熊坐勒岸旁边讲：“妈妈，妈妈，我肚皮饿煞脱了，侬捉条鱼来拨我吃好伐？”
熊妈妈呒没讲闲话，一家头勒河边耐心个观察，过脱呒没多少辰光，伊就捉到了一条大鱼。小熊看到了，伊老老开心个跳起来，爬过去，想去吃鱼了。
熊妈妈讲：“侬走开，想要吃鱼就自家去捉。”一歇歇辰光，熊妈妈就拿一条鱼侪吃光了。接下去，伊就到岸边去孵太阳，打瞌目充了。
小熊个肚皮饿得咕咕叫，伊又勿会得捉鱼，就想到小树林里去寻草莓吃。但是啊，有草莓个季节已经过去了，伊寻勿到一只草莓。小熊肚皮老饿个，又邪气吃力，伊就去隑勒一段圆木头旁边休息了。咦！对了，平常，妈妈总归可以勒木头底下头寻到好吃个物事个。小熊豪扫爬起来，用力去推搿段木头，但是呢，伊以前也呒没好好叫看妈妈是哪能做个，所以，伊推勿动搿段圆木头。还拿脚也弄伤脱了。
妈妈讲：“晏了，阿拉快点睡觉伐。”妈妈拍拍小熊讲，“侬肚皮饿，我也老勿开心个。但是啊，侬勿再是个小小囡了，侬已经长大了，就要学会自家去寻食物吃了。”
小熊点点头。
第二天早浪向，熊妈妈又带小熊去捉鱼了。
搿趟，小熊老老仔细个看勒海。熊妈妈立勒水里向，老专心个看牢仔河浜里向个鱼，准备勒海。突然之间，伊用脚爪捉牢了一条大鱼。搿条鱼滑溜溜个，老难捉个呀！熊妈妈拿鱼摆勒岸浪向。小熊也学妈妈个样子。也邪气专心个准备勒海。有好几趟，伊就差一眼眼抓到鱼了，但是鱼实在忒滑了，又逃脱了，小熊一次次个捉呀捉呀！到最后，伊终于捉着了一条小鱼。搿条鱼勿大，但是小熊也老开心个，因为搿个是伊自家捉着个呀！
小熊拿伊捉到个小鱼摆个妈妈捉个大鱼旁边。熊妈妈邪气开心。伊讲，好了！阿拉吃饭。小熊拿自家捉个小鱼侪吃光了。熊妈妈呢，又拿自家捉着个大鱼分了一半拨小熊吃。
小熊讲：“妈妈，妈妈，下趟我也要捉大鱼拨侬吃！”
特别感谢高仁先生提出的良好建议，并且不辞辛劳地合成本期音频，使朗读音频更加清晰动听。
往期回顾：
图片来自网络