吃价钿
沪语朗读：郭健
作者：郑自华
沪语改写：丁迪蒙
诵读：郭健
上海闲话当中，“吃”是经常出现个，譬如，吃瘪，吃上风，吃勿开，吃轧档，吃生米饭，吃白板，吃生活，吃排头，吃老酸。
由于上海闲话个特殊性，勒老大程度浪，“吃”并勿是传统意义吃，上面所举个例子基本浪搭“吃”个本意呒没关系。上海人常庄讲“吃香烟”，香烟哪能吃？其实，搿搭个吃是吸、抽；再譬如，谈恋爱当中个男女青年，为了表白爱情，往往用“吃煞侬”来表达爱意，搿个吃是欢喜个意思。
“吃价钿”，搿个“价钿”，就是阿拉平时所讲个“价钱”、“价格”。“吃价钿”，并勿是讲拿价钿吃下去，而是指“价钱”、“价格”超出了一般人个心理预期能力，或者讲超出了同类商品个价格，或者，勒同类商品当中属于价格高出一大截个，所以搿个“吃价钿”就是吃勿消搿个价钿，看勿懂搿个价钿。
譬如价格上万个LV包，就邪气“吃价钿”。包个功能是装物事，从本质浪讲，上万元个LV 包包搭仔十几元、几十元个包包并呒没啥区别。问题是“吃价钿”个包包勿是每个人可以消费得起个，“吃价钿”个包包是为有一定经济实力个人准备个，是显示一种“身份”。
“吃价钿”个商品，一般侪老贵，有档次，看上去“弹眼落睛”，鹤立鸡群，勿同凡响个。交关女性勒公共场所背只世界一线品牌个包，除了体现自家个身份以外，更加多个是得到虚荣心个满足。不过，还有勿少商品勿显山勿露水，看上去普普通通，貌物惊人，但是内行个人一看就晓得“吃价钱”。
我曾经勒上海一家邪气有名气个咖啡馆，经人介绍搭一个老克勒见面，请教点事体。只看见老克勒着一双旅游鞋，牛仔裤，老头衫，手表看上去也没啥特别。后来我搭我朋友讲，侬介绍个老克勒搭一般人没啥两样啊？朋友讲我是“巴子”，伊讲，老克勒身浪搿套行头邪气“吃价钿”，小小个铭牌，考究个面料，精致个做工，完全是一线牌子个衣裳，但是老克勒身浪呒没暴发户个俗气，勿张扬、勿招摇，勿动声色，勿显山露水，但是又勿失身份，表明了主人有生活品位，而且是恰到好处，勿露痕迹拿自家个生活态度表现出来了。朋友悄悄叫告诉我，搿个老克勒欢喜收藏名表，屋里向少讲讲有几十只世界名表，搿眼表大部分是限量版个，每只表绝对是“吃价钿”个。据说有国外个藏家愿意出大价钿收购，老克勒勿为所动。
此外，生活当中还有“老价钿”个说法，搿搭个“老价钿”有两种含义，搿要看啥个地方，啥个场合，相当于阿拉平常讲个语言环境。有辰光，“老价钿”是早期个价格，“老客户了，老价钿卖拨侬！”搿个是按照涨价以前个价钿出售，可能便宜勿了多少，但可以让顾客邪气温暖，觉着有人情味；还有种“老价钿”，是指某种商品价格比较贵，“勿要看搿个物事勿起眼，伊是老价钿了！”搿搭个“老价钿”，就是指价钿贵，“老价钿”个商品其实也是“吃价钿”个。刚刚讲个老克勒身浪一套行头，还有伊屋里个伊些名表，勿仅“吃价钿”，而且是“老价钿”呀。
最近一段时间，因为物价涨幅比较大，老价钿个商品勿大有了，而吃价钿个商品是越来越多了呀！
往期回顾：
图片来自网络
“上海言话讲起来”感谢您的支持转发，欢迎关注本公众号