沪语朗读：邬渊敏
原创：崔立(沪上微客厅)
改写、诵读：邬渊敏
丽婷邪气无聊个坐勒房间里向，汗滴滴答答个往下淌，大清老早化个妆，老早拨冲得清清爽爽了。为了错开用电高峰，供电所选择勒今朝让搿块地方拉闸停电。热啊，丽婷勿断个揩汗。汗呢，像啥是越揩越多了。搿种天，啥辰光可以落场雨啊。丽婷嘴巴里向勿断个勒骂昨日夜里个天气预报里，伊个胖胖个老头子。伊勿是讲，今朝要落场暴雨个嘛？搿雨呢！骂发骂发，丽婷又勿自觉个骂起大伟来了。结婚前头横讲竖讲发誓勿再去赌了。但是结了婚以后呢？呒没屏过几日天又拿心思放到赌台浪向去了。本来今朝礼拜六，讲好一道去滑雪场避暑个。啥人晓得，大清老早一醒过来，大伟留勒张条子讲，兄弟伊拉催，三缺一，下趟再去滑雪场。搿只死鬼，娘个死匹！丽婷咬牙切齿个骂山门，汗，滴滴答答个像啥是更加多了。身浪粘搭搭邪气难过，丽婷就去冲了把冷水浴。搿天，真让人热得受勿了啊。 莲蓬头里个冷水浇了身浪向，真是适意啊。丽婷立勒莲蓬头下头，邪气适意个动来动去，勿知勿觉中，丽婷就想起来搭大伟一道来个小伙子，蛮适意个，长得也清秀。讲起言话来软软糯糯个，看到丽婷还叫，阿嫂，侬好。拨大伟一顿讲，一边笑一边骂，啥阿嫂，叫阿姨么好唻。小伙子个面孔勿自觉有眼红起来，像煞有点尴尬。丽婷白了大伟一眼，讲，我啥地方有介老啊。叫小伙子，实际浪向是还没结婚个男人，刚刚大学毕业进大伟伊拉个公司。丽婷笑嘻嘻搭小伙子讲：坐，勿要睬大伟，侬想叫啥就叫啥！一想起搿个小伙子，丽婷个心一记头就舒展开来了。丽婷想，小伙子面孔浪向细软个绒毛，还有宽阔个肩膀，白嫩但勿失光泽个皮肤……一想到搿搭，丽婷又有眼心慌起来。就屏勿牢要骂自家，勿晓得羞耻啊。汏好浴，丽婷又坐回到沙发。心里一直平静勿了了，满脑子侪是小伙子难为情个笑。台子旁边个电话突然介响起来，丽婷吓了一大跳，以为是大伟，就屏勿牢心里向个火气，拿起电话就骂，侬搿只死鬼，终于晓得打电话回来啦，侬哪能勿去死死脱啊……骂了半天，丽婷好勿容易停下来。电话对面是一个糯嗒嗒个声音，阿嫂，是我呀，阿哥勒屋里伐？我等歇来寻伊。也勿晓得丽婷当时是哪能介想个，居然毫勿犹豫就讲了句，勒浪，勒浪个！侬过来好了。挂脱电话，丽婷再慢慢叫清醒过来。一想到自家居然搭小伙子讲大伟勒屋里，面孔一记头就发烫了。丽婷勿敢想象，假使等歇小伙子过来，会得发生眼啥事体……丽婷心里像火一样烧起来，突然之间希望老天爷快点落场大雨，小伙子可能就勿会来了。又希望，千万勿要落雨啊，希望小伙子可以来，一定要来个呀。地浪开始溅起噼里啪啦个声音，天浪向落起黄豆大个雨滴，还勿算大，但粒头勿小。时勿时有霍险，发出一道一道吓人个光。丽婷心里越来越紧张，脑子里一片混乱。门突然拨重重叫个敲响了，丽婷个心像啥要一记头跳出来一样。但丽婷还是快步走到门口头，打开了房门。丽婷一记头呆脱了，门口头立勒海个居然是大伟，大伟笑嘻嘻个看牢丽婷讲：丽婷，动作哪能介快个啊。丽婷邪气快个掩饰自家个慌乱，勉强笑了笑讲，哦，侬终于晓得回转来啦？“丽婷，勿要生气嘛”，大伟一边笑一边关门，讲，今朝我赢钞票了。侬一个人勒屋里老没劲个伐？丽婷白了大伟一眼：我还以为侬勿回来了呢！大伟跑上去安抚丽婷，发觉丽婷个心跳得老快，又发现丽婷个额骨头浪勿断有汗冒出来。大伟有眼奇怪，讲，落雨了，侬哪能还介热啊！突然，一道霍险，接下来发出了重重个爆炸声，一道电光滑过……搿个辰光，门又轻轻叫拨敲了。啥人啊？大伟放开丽婷，快步走到门口头去。丽婷个心却一记头感觉要爆炸开了，勿自觉个拿眼睛闭起来，汗，勿停个往下头流……“侬好，我来抄水表”。门口头立勒一个四十几岁着工作服个男人，勒搭大伟讲言话。送走了抄水表个，丽婷刚刚坐下来，看到窗门外头一片一片乌云又勒飘过来。门又轻轻叫响起来了。丽婷个心又一次紧张起来。大伟急急忙忙走到门口头。搿个辰光，窗外又开始落大雨了。迭趟个雨，粒子粗，落得也密，像一粒粒成熟个黄豆重重叫个敲勒地浪向。
图片来自网络
上海言话叙身边事体
吴侬细语吟诗词歌赋
麻球
茅屋为秋风所破歌
养蚕宝宝
衡山路高安路一带，叫做“圣乔治”
妈妈脸上的皱纹
“苏北人”搭仔“江北人”勒语气浪有差异
我是红楼哪一钗？
大隐书局沪语诵读会
观沧海
表情
高墙与鸡蛋——耶路撒冷文学奖获奖演讲
咸亨一享
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号
