回忆姆妈烧的水潽蛋 / 开普饭

沪语朗读：许建忠

回忆姆妈烧的水潽蛋

作者，朗读：许建忠

沪语指导：张林龙

记得我小个辰光，屋里向只要来了新客人，我个姆妈，就会端出一碗热气腾腾个水潽蛋，来招待伊拉，显得热情客气，大方得体。

噢，有人问我，啥个叫新客人？呶，伲浦东人一般是指，头一趟上门的毛脚女婿、毛脚媳妇，或者是难板上门个客气亲眷。迭个辰光，我就像只跟屁虫，屁颠屁颠个跟了啦姆妈个身后头，伊去鸡棚里拾蛋，我就跑辣伊前头，帮伊将鸡棚门开好。姆妈上灶，我就辣灶肚里添柴烧火，水一开，姆妈就捺蛋辣辣碗边头一敲，蛋壳一分两，蛋白蛋黄一股脑儿窜入踏踏滚个水里向，然后，伊盖上镬盖，呒没过几化辰光，就叫我熄火。只看姆妈掀开镬盖，吹开热气，用勺子滗脱浮辣辣表面浪向厢个一层白沫，然后拿蛋一只一只地盛辣辣碗里向，蛋黄熟里透红又含芳，蛋白雪白粉嫩但勿老，伊再往碗里向舀点汤，放一条羹个白糖。害得我馋吐水溚溚渧。

姆妈端着一碗七分满的水潽蛋，招待客人去了，而迭个辰光，我正老起劲个，爬辣辣灶头浪向，笑嘻嘻个打扫着镬底肚呢！