牵头皮

沪语朗读：施陈骅

朗读者

牵头皮

作者：郑自华

沪语改编：丁迪蒙

朗读：施陈骅

生活当中常庄碰到搿能个情况，由于考虑问题比较简单，有眼想当然，结果呢，差点造成麻烦而拨人家“牵头皮”。

小韦个母亲去世已经多年，前一枪，父亲也去世了。小韦是屋里向唯一个儿子，自认为思想新潮，决定要移风易俗办丧事，伊勒门口贴了张纸头：“移风易俗，丧事新办”。邻居想上门吊唁，拨小韦拦牢，指牢门口头贴个纸头，意思是：勿搞搿个一套：“阿拉连自家个亲眷也勿通知。”邻舍隔壁议论纷纷，责怪小韦勿讲人情，正勒勒争吵个辰光，拨来白相、看望个表阿哥看见，吓了一大跳。于是，娘舅、舅妈豪扫赶到小韦个屋里向，兴师问罪，拿小韦狠狠叫个骂了一顿。亲人亡故了，竟然可以勿通知亲朋好友，勿让人家看最后个一面，勿让做最后个告别，搿是随便哪能也讲勿过去个，于情理勿容。再说，无论再哪能“丧事新办”，也勿好拒绝人家个哀思，搿是“无情无义”之举。小韦搿能样子做，自然就拨人要“牵头皮”了，而且，迭种“头皮”是要拨人家“牵”一辈子个。

小韦因为考虑勿周而拨牵头皮，小韦个同事小金勒特定个场合也常庄拨人家牵头皮个。只要单位组织出去旅游，每次讲到要有集体观念、时间观念个辰光，就要引来大家个哄堂大笑，小金自然就会成为“主角”了。原来啊，前几年单位组织到张家界旅游，讲好自由活动以后，下半天3点钟集合，准时发车。啥人晓得到4点了，其他人老早就勒车子浪向坐好了，就是勿看见小金，而且，偏偏小金又拿手机落辣车子浪，根本就呒没办法联系伊。眼看天色满满叫暗下来了，搿搭是原始森林，茫茫林海，到啥地方去寻人啊！实在没办法，只好报警了。于是呢，武警、公安出动了几十个人，终于勒一片小森林里向拿伊寻到，而搿个辰光个小金也吓得来面色发青，牙齿也勒打相打了。

上海言话“牵头皮”，是用来比喻揭人家个老底、挑人家个短处，或者经常有意无意提起某人个戆事体，或者捉牢别人家个弱点勿放，拼仔命个数落、讽刺、挖苦个一种行为。“牵头皮”常常搭仔“牵一发而动全身”联系勒一道。前一抢看了世界达人秀，亚洲平衡大师美代子个“一根羽毛个重量”让全场观众惊呼，也让评委目瞪口呆。美代子拿一根羽毛轻轻叫个摆勒一根棕榈叶个梗子个一端，然后又拿起一根棕榈叶个梗子，邪气小心个挑起了刚刚伊根托牢羽毛个棕榈叶梗，就搿能，一根接牢一根，只看见十几根棕榈叶梗搭出了一只立体个支架，随后伊又用两只手拿搿只支架邪气稳个托起来，甚至于还拿伊整个顶勒头浪。最后，伊又用脚拿地浪向个最后一根叶梗勾起来，竖直了支起整个支架。现场个观众大气勿出，背景音乐邪气舒缓，像煞是怕影响演员个情绪，整个表演可以讲是极其个完美。只看见美代子随手抽脱了支架前端个羽毛，整个支架一眨眼个辰光就崩塌了，现场马上响起了雷鸣一样个掌声。一根羽毛个重量可以讲是微乎其微个，但是失去了伊，整个立体个支架就会得轰然倒塌！搿搭个“一根羽毛个重量”搭仔阿拉常常讲个“牵一发而动全身”有得异曲同工之妙，一根羽毛会得破坏整个平衡，而牵一发实际浪向就是牵头皮。由于头皮是头部个保护层，拨人牵牢头皮就好像是拨揭去了保护一样使头部受到伤害。

当然，牵头皮也要看场合、看对象，无伤大雅、无关紧要个，牵牵呒啥关系，甚至可以搭大家带来一眼笑料。但是，事关尊严、事关面子个“头皮”就勿宜过分“牵”唻！假使有人总归勒侬面前提搿桩事体，让侬觉着勿爽，或者拿搿个来要挟侬，葛末，搿个“牵头皮”个性质就发生变化了！

精彩回放：

起蓬头
宋词赏析     如梦令·常记溪亭日暮
少年游         柳永
拎只猪头好过年
同老相怜
青玉案·元夕
春节，上海人勿吃饺子吃年糕
归彼大荒（下）
归彼大荒（上）

图片来自网络