我的嫁妆——湘绣被面
沪语朗读：钱爱娟
我的嫁妆——湘绣被面
来源：夜光杯
作者：陈敏杰
改编：郭莉
朗读：钱爱娟
推荐：丁迪蒙
四十年前，我嫁人了。阿拉屋里向老规矩，女儿出嫁，娘家是定规要准备好丰厚个嫁妆个，再讲我又是大女儿，搿就更加是屋里向顶顶要紧个事体了。当时社会板要有个陪嫁，是脚踏车、缝纫机、无线电，还有碗盏、茶杯咾啥日用品，侪要一应俱全。更少勿脱个是床浪用品，葛末就是八条被头，搭仔配套个枕芯枕套，还有被单。
搿辰光，正好是百废待兴，物质极度匮乏，样啥侪要凭票证供应个年代。屋里向长辈还是一致决定，要搭我配齐迭眼嫁妆，特别是伊拉还提出了，八条被面子一定要用全中国勿同地区个丝绸刺绣。乃末，一家门就进入了任务艰巨个筹备阶段。
爹爹姆妈先是勒杭州寻到了织锦缎被面，一条银灰色，一条豆沙绿，花头是五谷丰登、五子登科，还配了繁华市井生活个背景，一副国泰民安个盛世吉祥景象。隔手又勒苏州买着了苏绣，勒上海郊区弄到了顾绣，跑到四川捧回来蜀绣，独独一条湘绣总归觅勿着。
后来是几经波折，爹爹到湖南乡下去仔好几趟。搿个辰光交通远远呒没现在介便利，爹爹一路颠簸，风尘仆仆，最后到底还是拨伊觅到搿条湘绣被面子！搿能，带了屋里向所有长辈祝福个被面子，陪牢我出嫁，陪牢我走上了新个人生之路。
新婚之后，搿条湘绣被面子搭仔其他被面子一道，侪拨我锁进了樟木箱，只有每年大伏天里，再会得拿出来见见日光吹吹风。每趟打开箱子，一阵樟木个清香散开来，时光年轮就好像勒勒眼前慢慢叫转动，一座座人生驿站也好像清清晰晰回放一遍。湘绣被面子仍旧介完好。亲人对我个爱，也就永远勒心里向储存，又一直勒我身边释放热烈个能量。
2012年早春真是冷彻心扉。我刚刚跨过一道病魔安排个生死门槛，终于重生，可以继续朝前走了。一个下半日，我跟晓岚相对而坐，阿拉侪是经历了各种失去，彼此心灵搭身体侪需要安慰。晓岚是我从前个工作搭档。伊2007年带了小小囡跟五只老大个行李箱，从宝岛台湾来到上海。我2010年搭伊认得个，伊勒勒工作浪向拨了我邪气大的支持跟帮助。搿日天，晓岚搭我讲了工作、生活个种种迷惘，种种辛苦。伊邪气痛苦个反问自家：为啥体要维持搿段婚姻？
谈话个辰光，晓岚讲到了伊个祖籍是湖南，勒伊台湾娘家屋里，一直挂勒梅兰竹菊四幅墨色湘绣作品，只要讲起湖南老家，伊个生毛病睏勒床浪好几年个爹爹就会一阵激动，并且眼泪汪汪。“湘绣”，突然之间，迭两个字像闪电恁介击中了我，我立时想起欸条压勒箱底个湘绣被面。我想借搿个上头凝聚个我爹爹对我个浓浓爱意，传拨晓岚力量。我就对晓岚讲：我有一条陪嫁个湘绣被面，我要拿伊送拨侬！过了两天，我拿湘绣被面子包好，郑重其事交到晓岚手浪个辰光，阿拉就从朋友升华到像是母女了。从此，我就像是伊个“上海姆妈”。后来，伊搭伊先生侪有了蛮大转变，大家侪努力促使婚姻朝好个方向发展，湘绣被面子包含个爱个火种，照亮了伊拉个心。再后来，伊拉又迎来了新个小生命！晓岚讲：“即使迭个家庭还会得有种种挑战、种种困难，阿拉也决定一直牵手一道面对。”
今年春天，晓岚一家门要搬到南方。临走个辰光，伊来拨我一样纪念礼物。小心翼翼个打开里三层外三层个包裹，我眼睛一亮，原来就是搿条湘绣被面！但是现在，伊已经改成了一件旗袍。我一记头感动到勿能控制自家，鼻头一酸，眼泪水别力拔拉落下来……晓岚告诉我：伊偶然认得一位设计师，迭位设计师只做“有故事个衣裳”。只要侬个故事足够打动伊，伊就搭侬拿有故事个旧衣物，改成有灵魂个新衣裳。
乃末，一条由被面子改出来个旗袍，凝结了四十年辰光，还有深似大海个情义。辰光是会得流逝个，但是亲人个爱，是永恒个。
本公众号最近发布的原创：
图片来自网络