绝不仅是美食街的黄河路
沪语朗读：渺渺
作者：周力
沪语改写，朗读：渺渺
齐巧走到黄河路，倒想起桩事体来。记得去年我写过一篇勒邬达克个国际饭店吃杯冷咖啡。其中讲到黄河路原名派克路（ParkRoad），“Park”之名个由来，讲起来有点意思。
一般个讲法，黄河路辟筑于1887年，初名东台路，搭卢湾个东台路同名，1904年前改称派克路，1943年10月更名为黄河路，搿是老版《黄浦区地名志》浪写个，相信是比较准确个。但“派克路”之名哪能介来个？呒没讲。望文生义个讲法，黄河路隔勒南京西路，老早叫静安寺路，对面就是人民公园，叫Park Road毫无疑问。但是，人民公园是解放以后改个，1904年个辰光，伊面还是跑马厅，英文名叫Shanghai Race Club（上海跑马总会，按照现在个译法就是上海跑马俱乐部），假使以跑马厅为名，叫Club Road可能更加贴切，葛为啥叫Park Road呢？
有一种观点认为“派克路”得名于英国公使阿礼国（Rutherford Alcock）个翻译亨利·派克，是表彰伊扩张租界有功。对迭个讲法我有一点疑问，因为阿礼国搭当时个苏松太道道台麟桂（有人说是上海道，事实浪上海当时只是县城，并没“道”一级别个资格）订约扩张租界，是勒1848年（道光二十八年），之后个1851年辟筑花园弄（今南京东路个前身，又名派克弄，Park Lane），阿礼国团队当中假使有“派克”搿个人，照道理应该搭南京路关系更加密切。而阿礼国其人，1901年（光绪二十七年）勒伊死脱以后四年，勒虹口命名一条爱而考克路（AlcockRoad，即今安国路）。勒十九世纪八十年代为阿礼国个翻译命名一条马路，我觉着勿大可信。当然迭个只是我根据我个认识进行个推测，并非严格个考证，只能表达迭个意思：黄河路原名派克路，“派克”（Park）之名个得来，我还有点疑问。
我一向信奉“尽信书不如无书”，何况还是网浪看个材料。勿相信？现在一般个讲法，黄河路长755米，老版个《黄浦区地名志》是迭能写个，百度百科也是迭能写个，还有啥个疑问伐？当然有个。因为黄河路755米，是从南京西路延伸到南苏州路个，但新闸路到南苏州河路中间埃段几十米个黄河路，已经造了中泰公寓，路没了。755米哪能也应该减脱二三十米，对伐？现在个黄河路，应该是从新闸路口个“超级过街楼”开始个。
黄河路青岛路口个“金色家园”，裙房是商务楼，有商店也有教育机构。搿搭原来是上海交通运输公司工人俱乐部，再早是建于1930年个明星大戏院。
明星大戏院最早以电影为主，四十年代改营戏剧，兼映电影。勒越剧历史浪，明星大戏院有伊独特个地位。先后有雪声越剧团、东山越艺社等勒此地演出。徐玉兰为首个玉兰剧团先是勒龙门大戏院，后来转到国泰大戏院，总归困难。到了明星大戏院以后，徐玉兰寻到自家个黄金搭档王文娟，开始了一段越剧传奇。而范瑞娟、傅全香、张桂凤、毕春芳、吕瑞英、金采风等演员，以及南薇、韩义等编导，先后侪曾勒雪声搭仔东山工作过。明星大戏院勒越剧史浪个地位，由此可见一斑。解放以后除脱演出越剧，勤艺、努力等沪剧院也曾经勒此地演出。不过明星大戏院1961年结束，交运工人俱乐部后来也成为了商品房，历史，只有从照片搭仔文字当中再可以看到了。
过了青岛路个一大片旧式建筑，是老有名气个承兴里。老上海人熟悉个打弹子、滚圈子、踢毽子、造房子、刮片子等弄堂游戏，勒承兴里搿条弄堂办成运动会，并因此造就了“健身弄”个传奇。1988年，当时承兴居委会洪克敏等人组织居委里个妇女召开“妇女运动会”，内容就是上海人熟悉个弄堂游戏，后来男同胞也参与进来，“九子游戏”成为上海弄堂文化勿可分割个一部分。
勒黄河路北京西路口个黄河路178号，曾经诞生过中国第一家女子医科学校：上海女子中西医学校，创办于1905年。老多上海人侪晓得锦江饭店个创始人董竹君，却勿晓得上海还曾经有个“中国个南丁格尔”张竹君。张小姐1876年生于广东番禺，1900年成为中国第一位女西医，1904年到上海。根据相关记载，张竹君勒“派克路登贤里”开设诊所，迭个讲法显然有误。登贤里虽然离黄河路老近，但却是勒凤阳路浪个。凤阳路原名“白克路”,派克，白克，听上去倒是有点像个，是勿是搿搭搞错了？张竹君个学校地址是派克路178号，离伊个诊所也勿远。张竹君学西医、不裹小脚，还勒上海教女性学西医，是具有划时代意义个，当时引起相当大个争议。1911年辛亥革命以后，伊又发起成立中国赤十字会。马君武崇拜张竹君，追求未成之后写了“女权波浪兼天涌，独立神州树一军”个诗，多少有点酸，不过说出张竹君个抱负：绝勿仅仅满足于做医生，伊要做中国女权运动个领袖。1937年，抗战爆发以后张竹君就深居简出，直到1964年勒上海病逝。张竹君有趟搭伍廷芳夫人乘船到上海来，中途碰到强盗，匪徒听说抢个是张竹君，财物奉还之外还连连道歉：“实在勿好意思”，民国报纸浪登个事体真假难辨，但也从一个侧面反映了张竹君女士个为人。
北京西路以南，就是当年有名个“美食一条街”黄河路了。黄河路搭仔乍浦路当年个繁华，从老照片当中可以看出端倪，尤其是夜景，用“灯红酒绿”来形容再贴切勿过。围绕勒搿条美食街，风云人物起起落落，现在繁华落尽，有几家老字号仍旧勒坚持，街浪开出老多稀奇古怪个网红或者网勿红个新式餐饮，延续勒美食街个血脉。只是当年黄河路个繁华搭仔传奇，终究已是过眼云烟。
到了国际饭店，黄河路个故事应该结束了。结束搿段旅程之前，我想提个问题：“国际饭店”搿四个毛笔字，出自阿里位书法家之手呢？恐怕呒没忒多人晓得。我也是一个偶然个机会再晓得：写迭四个字个，是复旦大学老教授林同济先生。关于林同济先生个生平，有兴趣个朋友可以自家去搜索，抄书我就勿抄了，简单介绍一下。老先生1906年生于福建福州，清华大学毕业。20岁赴美留学，专攻国际关系搭仔西方文学史，兼及文学、哲学。回国以后执教于南开大学、西南联大搭仔复旦大学，勒昆明创办《战国策》杂志，以战国时代个谋士自诩，研究天人之变，融合中西哲学，提出一系列以重建中国文化为宗旨个主张。解放之后勒复旦大学任教，因为历史原因，一系列变故侪碰着了，谋士当然做勿成，西方哲学也勿好研究了，就到外文系去教英语。复旦大学外国语言文学学院个网站浪对伊个介绍为“著名莎士比亚研究学者”，“译有《哈姆雷特》”，当然伊个学术成就勿止于此，人生追求亦勿止于此。但伊写个书、伊个思想搭仔著作，现在晓得个人勿多了，留下来“国际饭店”迭四个毛笔字，每个排队买蝴蝶酥个人，包装袋浪侪有迭四个字，虽然吃者无心，但也算是对林同济先生个一种纪念吧。
好了，黄河路个故事今朝暂时先讲到搿搭。勒埃些鳞次栉比个店招背后，还有多少往事值得大家去了解呢？
往期回顾：
農曆廿四節氣詩詞誦讀 小滿——五絕·小滿
沪语民谣——小口罩
图：网络 / 编辑：渺渺