三伏说“伏” / 开普饭

沪语朗读：潘慧芳

三伏说“伏”

来源：淮海白领群

原创薛理勇

沪语改写：丁曙立

讲述：潘慧芳

修正、推荐：丁迪蒙

农历六月已经进入了盛夏季节，烈日高照，邪气热，让人觉着心烦意乱。大家侪伊叫作“大伏天”，又讲“三伏天”，搿个“伏”，是啥个意思呢，蛮少有人去追究了。现代人讲科学、讲情调，拿“伏”理解为“避暑之意”，搿个搭古人个理解，搭仔传统文化实在是勿搭界个。

农历一般以夏至搿天作为进入夏季个开始，夏至呢，往往是公元个6月22号。从冬季开始，北半球气温一日比一日冷，民间有“冬至数九”个风俗，而夏至开始呢，北半球气温一日比一日高，民间也有“夏至数九”个习俗，我记得其中一首，大致个意思是：第一九、第二九，开始要摇摇扇子了，第三个到第六个九，气温上升到最高点，要吃冰水、乘风凉来消暑，到了第七个九之后，气温又开始下降，睏觉要盖被头了。

所谓个“伏天”一般就是勒夏至后个“三九”到“六九”之间，老底子个《阴阳书》是迭能讲个：

夏至后，第三庚为初伏，第四庚为中伏，立秋后初庚为末伏。

初伏、中伏、末伏合称为“三伏”，大致是夏至之后个“三九”到“六九”之间，古人拿“伏”定于“庚日”，搿搭古人个阴阳五行理论相关，因为天干个“庚”拨推算之后就是五行当中个“火”，而火当然是邪气热个了。

“伏”是个会意字，左边是“人”，右边是狗，像狗跟牢或者听从主人，所以“伏”个字义有两个意思，一是侍候，二是俯伏、隐藏。古人对“伏日”个解释是：“伏者，谓阴气将起，迫于残阳而未得升，故为藏伏，因名伏日。”原来，大热天阴气拨阳气压牢被迫藏伏起来，搿能介个气象日脚就叫“伏日”。

度过大热天叫“消暑”，吃冰水，吃冷饮是消暑个好办法。古代人呒没制冰设备，只好拿冬天介个天然冰囥起来到热天介用。老底子，勒今朝张华浜军工路一带个黄浦江边头，有交关用稻草盖勒海个老厚实个大房子，搿就是储冰用个，勒草房子个四周是人工开凿个老老大个池塘，到冬天结冰个辰光，挨一挨二拿江水引到池子里向，让水结成冰块，经过切割之后再囥到草房子里向，房子个密封性搭仔保温性侪勿错个，到夏天，可能会得有小部分冰融化，而大部分侪蛮好，搿些冰块主要是提供拨出海捕捞个渔船搭仔上海个水产商，用来“冰镇”海鲜个。秦荣光《上海县竹枝词·物产》里记载：

楝子开时石首来，花占槐豆盛迎梅。

火鲜候过冰鲜到，洋面成群响若雷。

里向讲个“石首”就是“石首鱼”，搿搭特指黄鱼，“梅”是一种样子搭小黄鱼邪气像个“小梅鱼”。前句是上海谚语，意思是“楝子花开个辰光，黄鱼也开始上市了，假使搿一年槐树花开得好，葛末搿年个小梅鱼产量也一定邪气高。”作者有段注解：“网捕冰藏，船载而至，名‘冰鲜’。”“其秋冬捕得者，俗称‘火鲜’。”深秋至冬天捕捞到个鱼不必冷藏就运入市场，叫作“火鲜”，而春夏捕捞个鱼必须用冰镇保质，叫作“冰鲜”。就好比今朝呒没拨冷冻过个鱼称“热气鱼”，经冷冻个鱼叫作“冷气鱼”一样。

上海冷天介储藏个天然冰大部分供捕捞业搭仔水产业保鲜用，到了大热天则向市民提供消暑用品。

初庚梅新忽三庚，九九难消暑气蒸。

到了大伏天，上海就多了交关沿街设摊或者穿弄堂个卖冰冻地栗糕、冰冻酸梅汤咾啥个小摊贩。

“六必居”是北京历史最悠久个酱园，据说，明朝宰相严嵩邪气欢喜吃搿家酱园个产品，店家就乘机经常搭严府送酱制品，并请严嵩起个字号，严嵩就根据《礼记·月令》中讲个制酱必要条件——“秫稻必齐，曲孽必时，湛炽必洁，水泉必良，火齐必得”当中个“六必”而取名“六必居”。

北京人喜欢吃大酱，因此北京有交关酱园。北京个博物馆里收藏了交关老北京个幌子，也就是店招，酱园个店招浪是一只壶芦，上头写个老大个“伏”，所以，北方人拿酱叫“伏酱”。搿个“伏”就是“伏天”个意思，勒自然条件下头，制酱必须勒伏天里进行，否则，酱就难做成功。江南一带，拿伏天制酱叫“合酱”，实际浪，搿个“合”写作“罨”，指拿一件器皿覆过来盖到另一件器皿浪，以前，屋里呒没冰箱，庎橱也邪气小，假使碰到小菜忒多吃勿脱，就会拿只碗覆过来盖到另外只碗浪，讲：“侬拿碗罨过来盖牢就可以了”，现在，家家户户用冰箱，呒没必要用搿个方法保洁，“罨”又是冷僻字，老早就拨“合”字替代了。