情系白兰花 / 开普饭

沪语朗读：王敏

朗读者

情系白兰花

作者：王敏

文字改写：丁迪蒙

诵读：王敏

讲到鲜花，就会立时三刻想到美丽、芳香。大家侪爱美，自然就会得欢喜鲜花，并且会得想方设法子用鲜花来打扮形象、美化生活；勒搿个方面，尤其是女性。假使有人问，阿里种鲜花搭人体接触是最为近密个，我会得讲，搿就是白兰花了。

白兰花又名“缅桂”，木兰科，常绿乔木，原产印度尼西亚爪哇岛，我国南方各地侪有栽培个；夏秋时节开花。每到热天介，白兰花就开始进入了阿拉个生活。夏天日长，大清老早，马路浪向就可以看到大家活动个身影，而伊个慢慢叫吹过来个、带了眼清新个气息、稍微有眼凉意个晨风，会时勿时传过来一阵阵兜售白兰花个叫卖声：“白兰花要伐，要伐——白兰花”。

跟牢仔叫卖声朝前走，跑到摊点前头。卖花摊点多数勒人流比较稠密但又勿算轧个地方，比方，弄堂口口头、店面旁边、马路边浪咾啥。卖花者多为中年妇女，摊点比较简单，大多数是一只小板凳、一只盛放花朵个器具，用得比较多个是藤篮，里向铺一层毛巾之类个物事，盖牢还没整理好个散花，毛巾上头摆个是手工整理好个“成品”白兰花。

散花呢，是一朵朵个花头，披针状花型，花瓣是瘦长圆尖形个，真像迷你型个少女个纤巧手指；花是本白颜色，淡淡个乳白当中有一眼眼薄薄个淡浅黄，近似于和田玉当中个羊脂白。因此，虽露素淡简朴之貌，却无轻浮浅薄之相，拨人有纯度、有厚度、有温度个观感。

白兰花个香气更加让人欢喜。伊有五个特别之处：

一，香气清新馥郁，呒没浓烈粗俗个刺鼻感

两，香型幽雅清冽，兰花个香味道里含有水果香，自有品位；

三，香味醇厚又略带凉爽之意，闻勒海有静心安神消暑个感受；

四，香性纯正大方，毫无妖冶怪异个气息；

五，香期持久，即使花朵已经枯萎，却仍旧有得余香勒勒散发。

所谓白兰花成品个整理工艺，其实也就只是两道简单个手工动作：先是将瘦长针形的花瓣理顺、归齐，用细细叫个棉线轻轻叫扎好；再用扭有环扣个细铁丝从花个蒂部刺进去，拿两朵或者三朵并列联接勒一起就可以了。

白兰花物美价廉，只要一眼小钞票就可买两只或者三只花头串成个花饰成品了。买花个人年纪大小侪有，以女性居多。与其他鲜花品种勿同，白兰花属于小型花头种类，色彩单一，也因为是搿个原因，伊装点生活个形式再搭人体是如此个贴近。到了手个花，虽然有拿伊邪气小心个包起来、摆到随身包袋里去个，不过，绝大多数人则是拿花饰佩扣勒勒衣襟浪向，让花香随时随地悠悠叫个散发开来；戴了花个人走到阿里，就拿一缕缕香味道带到了阿里。

小摊零售白兰花也可以讲是老上海个一道别致风景，其中流露出一种淡淡个稍为带眼奢侈个生活情调；勒我搿一辈经历个年代里向，上海个女性大多数是有白兰花情结个。

我搭白兰花结缘是母亲个引荐。伊个辰光，我还是个懵懂少女，一个热天介个早浪向，买菜回转来个母亲拿我姊妹几个叫到窗门前头个台子边浪，从竹篮头个最上层拿出一只小包包，慢慢叫打开，露出了几头白兰花，用手节头轻轻叫拨弄，让伊拉摆布得匀称整齐，然后就让阿拉去闻。“真好闻啊”，我感叹，看上去介朴素单纯、纤细小巧个花朵竟然会得介香个！经母亲个开导，我认得了白兰花，并从此搭白兰花有了经常个接触。母亲勿单单是教阿拉识花，更加勒教阿拉做人、热爱生活。

我个母亲性情温和纯朴，勤劳善良，内敛而从勿张扬，用现在个流行语来讲，就是邪气“低调”个。单位里向个事体，勿分份内份外，只要需要，让伊做伊侪做个，从来也勿计较，同事道里侪赞誉伊。家务事，更加是里里外外一把手，一家人家个衣、食、住、行侪由伊操持；就算是粗茶淡饭，也要配几只碟子、盆子、碗盏咾啥个，就算是是家常衣裳，出门前头伊也要用简单个熨斗烫烫平整，平常生活当中讲求“情调”，由此可见一斑。母亲搭人之间个交往和善大度，伊认同“吃亏是福”个信条，主张与人为善，厌恶暗地里向使阴招，所以呢，人缘邪气好。母亲是平凡个，但勒我心里伊是邪气可亲可爱，就象白兰花，单纯、淡泊、弱小，一尘不染，清香馥郁，并且毫勿张扬；于是，我勒两者之间好像感觉到了某种相通个意境。久而久之，我对白兰花个印象深化了、情意浓厚了，时勿时会得牵记伊；每趟想到，脑子里向就会得出现母亲个音容笑貌。

现在物质邪气丰富，各种鲜花应有尽有，想用来装点生活、打扮形象也有充分个条件选择；假使觉着香气勿够，也可以选择所需要个香型搭仔浓度个香水、香料咾啥来满足各种需求。白兰花慢慢叫淡出了大家个视野，晓得伊、熟悉伊、欢喜伊个人也越来越少了。不过我是勿会忘记个，伊个清纯自然、伊个朴素纤巧、伊个馥郁幽雅，还有伊个普通平凡，印象历久弥新。

我想，社会勒发展进步，生活勿断富裕提高，但是，历史个长河经过激荡扬弃，伊些有价值个物事总归是会留存下来、积淀起来个，是勿应该、也勿会得拨遗弃个。