亭子间阿姨（下）
沪语朗读：丁曙立
作者：汤蔚
沪语改写：荣梅
文字修正：丁迪蒙
亭子间阿姨勿大看人家，闲话也蛮少个，伊勿想再结婚。有人认为伊忘记勿脱某公子，有人猜测伊积了勿少钞票，勿愁吃勿愁穿，担心嫁人会得分出去一杯羹。当拨人家碰着伊勒旧货商店卖首饰个辰光，大家再晓得伊其实呒没多少钞票。阿奶讲，亭子间阿姨衣着光鲜，其实侪是旧个；菜品考究，用个侪是普通食材。只不过因为伊善于料理，再显得蛮出挑个。
70年代末80年代初，国家改革开放，插队知青返城，市场经济启动。私人企业像雨后春笋一样侪冒出来了，小商品集市也应时产生，为居民解决生计问题，各地区兴办工厂、加工场、大众食堂咾啥，招聘返城知青搭仔待业人员。亭子间阿姨也递交了申请表，但是主任呒没安排伊工作。
有人讲，主任常庄借因头寻亭子间阿姨，一双水泡眼滴溜溜个勒伊身浪看发看发，甚至还要动手动脚。亭子间阿姨讲勿想结婚，像戏剧里鸳鸯回头贵族老爷一样，拿主任回头了。为了勿拨主任着小鞋，伊也回头了别个相亲。
邻居拉搭伊出主意，叫伊写投诉信讨公道。伊只是淡淡叫笑，就呒没后文了。伊专心谋生之道，发现小商品集市个店主为了做生意，常庄呒没辰光吃饭，马上就有主意了。
亭子间阿姨大清老早跑小菜场买菜，回去拿食材汏清爽切好，煎、炒、烧炸，精心烹饪。快中浪了，伊就拿菜分类搭配装盒头，出售午餐。还没到一个号头，盒饭声名就响了。
亭子间阿姨从自家拎篮头卖，到用推车，再发展到雇人送餐，生意越来越火。伊又盘了只小小个门面，取名“鲜得来小馆”，经营风味美食。每日天，伊自家挑新鲜菜蔬，烧菜上菜，结账收款，活脱似像开茶馆店个阿庆嫂。
刚刚开张辰光，邻居侪去吃饭捧场，既帮助伊，也满足自家个口腹。大家自发为“小馆”作宣传，树口碑。亭子间阿姨拿搿眼情谊记勒心里，邻居个口味搭仔喜好伊侪邪气清爽，像待自家人一样相帮点菜，推荐菜式，邻居侪邪气捂心。
返城知青张建国，父亲是四类分子，屋里向老早就呒没啥物事了，主任也没安排伊工作。张建国以打散工谋生，着个是勿合身个旧衣裳，还常庄饿肚皮。亭子间阿姨雇伊做帮手，负责搬运物事，切菜，汏炉灶。店堂里向有了一男人，就多了几分安全感。
勿管客人到店里来是随意点还是吃桌头，亭子间阿姨总归是笑脸相迎。偶尔碰着挑剔个顾客，伊也忍牢勿讲啥，尽可能去满足。走远了再摇摇头叹口气，仅此而已。客人有过几趟搞，觉着没趣，也就正经起来，应了“和气生财，和顺通达”个处事格言。
假使生意勿大忙，亭子间阿姨也会搭顾客嘎山湖，伊样样会讲，就像行云流水，舒卷随意。伊讲过眼啥，客人可能勿记得，但耳朵边浪总归有糯嗒嗒个语调搭像夜莺一样个声音。
伊个辰光，亭子间阿姨四十几岁，仍旧是雪肤花貌，窈窕玲珑，勿辞辛劳个做生活。每日天，伊老早就到店里向，老晏再离开，以店为家呀。夜市结束，亭子间阿姨拿店门关好以后，又开始做冷盆，麻酱黄瓜粒、鲜辣萝卜丁、苔菜花生米、脆炸小鱼干。搿眼小菜勿勒菜单里向，是专门拨老顾客个赠品，像搿能介勿留痕迹个情谊，真个让人觉着邪气适意呀。吃过个人，侪讲伊个店名真个是名副其实。
有一日，亭子间阿姨送来了一封喜宴请帖，邀请阿拉参加伊个婚宴。姆妈开开来看，新郎是张建国。看请帖我再晓得，亭子间阿姨有个好听个名字“黄莺莺”。
往期回顾：
图：网络 / 编辑：渺渺