灶披间里个闲言碎语 / 开普饭

沪语朗读：王维杰

灶披间里个闲言碎语

原创：沈嘉禄

推荐、指导：丁迪蒙

沪语改写、朗读：王维杰

上海人个灶披间还是一个灵敏个信息中心，多少小道消息从此地散播。

哎呦！12号亭子间里个阿跷打了伊拉晚爷一记耳光，送进医院就一脚去了，侬晓得伐？14号前客堂个阿玲勒厂门口捡到一个小囡，有三只脚哦，送到医院里去人家勿肯收呀，讲，是伊自家养出来个，想拿包袱掼给拨政府啊，乃么，伊只好抱转来自家养。哎！23号前厢房个好婆勒弄堂口拾到一只军用背包，里面向有得好几千块洋钿，拿到银行里去一验么，讲是假钞票呀……

还有国际新闻类：尼克松总统访问上海，勒国际饭店吃了一盆绿豆芽嵌肉丝。海尔塞拉西皇帝到上海来，伊条大狼狗价值要十万块唻！西哈努克勒城隍庙吃了一碗鸡鸭血汤，饭店里杀特脱仔108只鸡唻……

当然咾，温馨个一幕也常庄勒灶披间上演个，李家阿嫂今朝包荠菜肉馄饨，盛一碗拨大家尝尝味道。张家姆妈摊了草头饼，大家也来吃吃看。张老伯伯孤老头子一个，作孽啊，睏勒床浪向两日天没吃物事了，大家也会得熬眼粥喂喂伊个。快点快点！刘家爷叔个饭焦脱了，相帮伊端端开。

上海人，侪是一根藤上向结个瓜，藤烂脱么，瓜也就瘪掉脱了。

但是呢，也勿妨碍大家暗地里向探探对方个家底，过年吃了点啥？或者囡儿回娘家来，烧了点啥个小菜？

等到煤球炉子消灭，用液化气了，居然也会得拿摆钢瓶个小箱子锁起来。上海人啊，就这搿副腔调个！

搿算啥啦？水笼头勿是老里八早就锁起来啦？

后首来，上海人有了独门独户个厨房间，从三个平方开始逐年升级，到今朝，七八个平方勿稀奇，有人还学外国人个腔调，开放式厨房，双门冰箱，老长个料理台，结果末，油咾，烟咾乱蹿，弄得客厅里向个电视机、音箱上头一层粘搭搭。

勒一眼土豪个屋里个向，厨房间里还装了大屏幕电视机，高保真音响，酒吧台直接从五星级饭店拷贝，勒厨房间里吃早餐，邪气有情调。级别更加高个土豪屋里还分中餐、西餐两种厨房，大得来可以跳舞。上海人个厨房间啊，真个是海威！

但，勿管多少大个厨房间，我发现极老少有人勒窗台浪向摆瓶鲜花，咸鱼、咸肉倒是挂勿少。请了小保姆个主妇，还歇勿歇个去瞄一眼，养媳妇偷吃热豆腐，搿句老闲话从来就勿是空穴来风。

上海人家个厨房间，就是认得上海人个一扇窗。

图片来自网络

上海言话叙身边事体

吴侬细语吟诗词歌赋

往期回顾：

“上海言话讲起来”旨在传播沪语，若有不当之处，恳请留言指正。

感谢您的支持转发，欢迎关注本公众号

灶披间里个闲言碎语

相关推荐