故里春秋（一）
作者：朱海洪
沪语改写：边秦翌
沪语讲述：孙維陵
推荐：丁迪蒙
故里，就是故乡个意思。
假使从小生活勒农村，叫故乡；我从小生活勒城市里个，就叫伊故里了。拿故里个风情写下来，就是故里春秋了。
写故里春秋，勿得勿从新昌路开始讲起，因为，我小辰光个所见所闻几乎侪离勿开搿条马路个。
修筑搿条马路是从清朝光绪二十五年，也就是1899年开始个。伊个辰光个上海滩分布了交交关关小河浜，当时个工部局就越浜筑路。造好个马路，北京西路以南个叫做梅白克路，以北个叫做蔓盘路。勒勒民国三年，也就是1914年，整条路改名字了，统称叫梅白克路；到了民国三十二年，也就是1943年，再改为新昌路。
新昌路南起南京西路，北到南苏州路，全长有得1150米。整条马路是又短又窄，两旁边有得交关小弄堂，名字呢，大多数是“某某里”、“某某坊”或者“某某新邨”咾啥。
由于勒勒市中心地段，人来人往邪气闹猛个。必过，六十多年之前，只有四、五岁个我，是跟牢仔姆妈、坐勒黄包车浪向过来个，看勿到啥个人，也看勿到车子咾啥，觉着还是蛮荒凉个，只有一幢红颜色个房子还印勒我个脑子里向。伊幢红房子呢，就是新昌路搭仔北京西路交叉口个新闸救火会。
救火会是上海开埠之后，随牢仔租界市政个发展而建立起来个职业消防队，实际浪，伊就是由上海原来个“水龙会”救火组织演变过来个。
旧上海一共有两只租界，法租界搭仔英租界，英租界也叫公共租界。法租界勒勒淮海路一带，公共租界勒勒南京路一带，新昌路是勒公共租界里向个。
当年个公共租界，一共有得六座“救火会”：中央、虹口、新闸、宜昌、静安寺搭仔杨树浦。勒北京西路口个伊只就是新闸救火会。搿是一幢红砖洋房，精致漂亮个门窗透出一种西洋风情，底楼转角处个三扇拱形门，就是救火车个进出口。
讲到新昌路个源头，是因为有新昌大楼，搿幢大楼也是搿条路浪向最高个建筑。新昌大楼一共有得两幢，坐西朝东，占地596平方米。伊个南楼有得六层楼，北楼只有四层楼，侪是钢筋混凝土结构。后首来，大楼成为了新昌中学。
南京路边浪个人民公园，老底子是跑马厅。跑马厅要养马个，马厩就勒勒新昌大楼个边浪向。
上世纪二十年代，沿牢仔新昌路，两旁边建造了勿少弄堂。第一条弄堂叫“懋德里”， 1924年造个，砖木结构、侪是二层楼个楼房，一共有得11幢房子。弄堂口有只开锁个摊头一直摆勒海个。从“懋德里”走进去，可以穿到“祥康里”。“祥康里”属于石库门里弄，里向一共有得121幢二、三层楼个、砖木结构个房子。弄堂口有家烟纸店个，“文革”个辰光关脱了，一直到了1994年，再重新开张。
“祥康里”62号是海关俱乐部旧址。99号有眼革命色彩个：1930年初，中共中央出版发行部经理毛泽民，勒此地建立起秘密印刷站。二楼住人，三楼是印刷、装订车间，主要翻印苏区来个文件、文章，印制有关宣传形势、罢工斗争情况个传单。勒搿个期间，印刷出版过《党个建设》、《红旗周报》、《布尔什维克》、《实话》等刊物。印刷站负责人叫钱之光，公开身份是底楼烟纸店老板，印刷站个活动一直持续到1932年夏。
朗读者
往期回顾：
图：网络 / 编辑：渺渺