浦东人个胃囗 / 开普饭

沪语朗读：余晖

朗读者

浦东人个胃囗

作者、朗读：余晖

推荐：丁迪蒙

“粥半夜、面黄昏、馄饨勿过客堂门”搿个是老底子浦东人个歇后语。按照现在来讲，夜里向吃点粥么，是保护肠胃个！养生个呀！吃碗面么，也更加容易消化呀！吃碗馄饨末也蛮好好，适适意意个。吃好仔么，哪能会得勒拉半夜里向、搭仔黄昏头走勿过客堂门，肚皮就又饿了呢？好像是有点夸大了，勿可思议。

必过，细细想来：搿句闲话可能是有来头个。勒勒上世纪八十年代之前，浦东还是大片个农田，因为人多地少又呒美啥个其它个经济来源，所有一切侪是计划供应个，而农村户口呢，大部分票证侪是没个，特别是油搭仔肉票，除非侬屋里向养只猪猡，否则末，一年到头，肉也勿吃上几顿个人家，到处侪是个，一年做到头，年终分红还有勿少人家是透支户，大人小囡往往勒别人面前连头也抬勿起来。所以，往往一家老小个肚皮里向经常是呒啥油水个。但是，田里向个生活倒是勿轻松个呀！特别是三夏个辰光，种双季稻，是要抢收抢种个呀！忙得来连吃饭侪顾勿上，经常是饿仔肚皮做生活。所以，搿个辰光，勿管是老个，小个，男个，女个，胃口是可想而知个。

屋里向拿出来个碗也是勿一样个，我伲叫伊“爷大碗”伲二阿哥因为胃口邪气大，所以绰号也叫“爷大碗”，一直叫到现在唻！以伊常庄粥是一口气倒下去个，面条呢，一缩就是半碗去脱了，菜肉大馄饨要吃三碗，再肯罢休。

另外，两百多年以前，浦东靠海边个地方侪是盐民呀！晒盐搭仔熬盐，侪是重体力个苦差事，所以要消耗个体力是可想而知个。勿吃饱肚皮，身体是撑勿牢个呀。侬讲伲讲个对伐？

因此，浦东人是蛮海胃个，或许“海胃”搿个词也是搿能来个！

大概是从此以后，就有了搿句看上去夸张，事实浪向并勿算夸张个歇后语流传至今了。