绿水青山黄泥拱
沪语朗读：顾天虹
绿水青山黄泥拱
作者: 林筱瑾
沪语改写：俞镝
朗读：顾天虹
四月下旬，菜篮头里向个竹笋已经勿灵光了，本地个蚕豆也从一斤要八块十块跌到了黄芽菜个价钿。搿个春季，过勒交关搭吃有关个日脚，觉着一记头腰粗了，人胖了交关，一眼“春捂”个群友也侪想出去白相相了，群主建议阿拉，捉牢春天个尾巴搞次聚会，一道到安吉去登山两日游。
消息传来，大家侪邪气开心，虽然讲，樱花、海棠花、桃花侪已经谢脱了，不过到一个宁静个竹乡去，也是个勿错个选择。东亚文明又是“竹头文明”，再加上，自家个姓名里向也有竹个影子，对安吉就更加是爱屋及乌了。
车子开到沪渝高速以后，转到了杭长高速，一歇歇功夫，山色就逐渐翠绿起来，远远叫看过去，绿悠悠个竹海勒阳光个照耀下头，山浪像盖了一层层芥末色个薄薄个毯子，有种用银调羹吃抹茶冰激淋个清甜个感觉。
一道去个王总是个无笋勿欢个安吉美女，宁可食无肉，勿可食无笋。阿拉看到附近匆匆闪过个竹林里向，一支支毛笋拔地而起，快要长到一人高了，心里向难免想，笋侪变毛竹了，还哪能吃法子？大家乘了半日天个车子，有眼吃力了，肚皮也有眼饿了，再加上王总个头头是道个笋经，更加让阿拉对搿趟个三顿饭充满期待。
果然，竹乡四月个农家乐台子浪是全笋宴：笋干烧肉、辣味笋、清椒笋衣、笋尖鲈鱼、笋鲜炖竹鸡，但是啊，就是勿看到风靡上海个油焖笋搭仔腌笃鲜。看来，聪明个乡下人也掌握了上海人个心思，让阿拉勒搿生态之地吃没吃过个新鲜小菜。刚刚采回来现炒个蔬菜是喷香扑鼻，再上一盘做干捞面配料个猪油渣，大家吃得邪气开心，嘴巴里向侪是猪油渣个香味。主人极力推荐当中个搿碗大大个笋汤，笋块肥厚、邪气好吃，白颜色个笋肉口感就像萝卜一样个细腻，安吉人叫搿笋为“黄泥拱”。春末，伊个顶浪个叶芽是嫩黄颜色个，笋衣是紫褐色、油光光个，搿种体型大得来像炮弹个毛笋新鲜水嫩，还没钻出烂泥个笋是最灵个。挖笋个人眼睛好，凭经验、看表面个裂缝，就可以邪气便当个寻到。但是，“黄泥拱”要挖出来，却是桩邪气吃力个体力生活了。
看阿拉老酒吃饱，有眼兴奋个样子，老板娘建议，让伊老公高老板带阿拉几家头到后院个山浪向去挖黄泥拱，体验一记。伊个老公眼睛也勿眨，就答应了，拎起一把小锄头，就带阿拉上山了。
进到山林里向大概百把米远，高老板就发现目标了。伊立勒竹林深处陡峭个斜坡浪向，随牢锄头一次次抡下去，红个泥块向下散落，黄颜色个芽尖就露出来了，再挖下去，要直到小腿能够完全碰到坑底个深度了，一根胖笃笃个黄泥拱再露出来，像尊静坐勒烂泥里向个实敦敦个雕塑，邪气可爱。
勒阿拉个欢呼声当中，黄泥拱拨挖出来了，足足有70多公分长。随后，又发现了第二根、第三根，到第四根个辰光，采笋个人已经汗嗒嗒渧，邪气吃力了……
阿拉亲手抱回来个黄泥拱，又成为了夜饭个美味小菜，勒微信群里收到了长长个一溜个点赞。
到半夜把，最后一批吃客也走了，我到楼下头去拿瓶热水，看到老板一家头还勒清理客人留下来个麻将残局。心里向立时三刻邪气感动，搿是一个宁可自家辛苦，也勿让老婆吃力个男人，搿是千千万万美丽乡村个浙江老板个缩影！
安且吉兮，福且富兮。
深深个为侬祝福！
往期回顾：
图：网络 / 编辑：渺渺如胭