还有侬不晓得个事体 / 开普饭

沪语朗读：俞颖

还有侬不晓得个事体

来源:马尚龙《上海路数》

上海话改写、诵读：俞颖

推荐：丁迪蒙

淮海路男小囡路数清爽

1956年，勒上海光明邨个老弄堂里，一户普通个宁波生意人家，生了个大胖儿子马尚龙，马上成龙。光明邨位于淮海中路584弄1-14号，是一座西式多层公寓，原名飞霞别墅。兜兜转转近半个世纪，老别墅仍旧囥勒法国梧桐个后头，外头个花花世界就象万花筒里个风景，天天翻了花样，让人眼花绿花。

成龙成凤倒是呒没，生意也勿好做，荡来荡去，马尚龙最后当了作家。男男女女个事体，弄堂里个旧账，翻云覆雨，侪成了伊笔下头个风景。每日天迭座城市侪勒变化，马路一歇宽一歇窄，但是，有些物事，有眼味道，有点路数，却会勿知勿觉个进入侬个灵魂。马尚龙对上海搿座城市个热爱，就象光明邨个第一笼馒头，从此地开始，又回到了此地。

小辰光，马尚龙从屋里向所在个4楼阳台探头望下去，就是光明邨个后门，假使风向变化，还会得带来光明邨个香气，微微个升到四楼个阳台。伊讲：“假使我正好是勒勒“咸菜过泡饭”，搿一缕似有非有个香实在是害人呀——吃了两碗泡饭，还想再吃两碗。”

迭个勒光明邨个油香味里长大个上海男小囡，最终成了名作家——伊热爱书写上海：上海男人、上海女人、上海马路、上海故事、上海个十里洋场、上海个吃喝玩乐……上海个路数，摸得邪气清爽。由此，作为海派文化专家个马尚龙推出了由文汇出版社出版个最新随笔集《上海路数》，呈现了栩栩如生个上海风土人情。

就像翻译家马振骋讲个，“《上海路数》内容搭仔文风侪非常上海，同时又让人感到强烈个个人风格。语言幽默辛辣，视野开阔，搿眼苦恼人个笑，有触动大众个灵魂。可以讲，要想晓得大上海个千姿百态，马尚龙个搿些文章则是“必读系列。”

光明邨还有侬勿晓得个事体

光明邨个熟食，还有鲜肉月饼，像煞是老有名了。排队总归是老老长个，到了节日里向就更加长了，有人会从大杨浦开了车子过来，勿讲排队个辛苦,拿停车费算进去，还真是勿便宜。光明邨旁边是条弄堂，也叫光明邨弄堂，弄堂勿长，排队呢，就顺了弄堂排进去，差勿多就排到了弄堂笃底人家门口了。据说光明邨个鸭翅膀蛮灵个，翅膀到了光明邨，真个叫是插翅难逃了。

卖熟食个店有得交关，就是光明邨个生意最好，名气也最响。有人弄勿懂，到别个地方去买了点熟食，就弄清爽了，有交关人家个白斩鸡、酱鸭卖相差勿多，吃到下头是连刀块，光明邨个生活就是清爽。

有人也问到我，侬老早住勒光明邨弄堂，侬讲是啥原因呢。我讲，我勿认得伊拉，勿是做广告，光明邨排队除脱味道好，还有是伊“风水好”，伊拉排队勿是现在，老里老早就勒排队了，至少有四十年，伊拉门口头一直是排队个。老早也是卖熟食个?老早勿卖个，不过侬要晓得，老早点勿叫熟食，叫熟小菜或者熟菜。一讲“熟食”就有点“巴(子)了”。

光明邨最早个人气是菜馒头，真个，四十多年前头光明邨馒头名气老响个。搿辰光是叫光明邨点心店，还勿是现在个大酒店。精白粉菜馒头肉馒头豆沙馒头，5分洋钿一只，半两粮票。勿管是啥馅子，上海人侪叫馒头，包子是北方人个叫法。

屋里向有人客来，大人拨我5角洋钿，半斤粮票，去买10只馒头，一般是五只菜馒头五只肉馒头；人客吃勿脱，就是阿拉吃。所以买馒头是一桩开心个事体。排队排上去，人虽然小，口气勿好小：”五菜五肉“，人家一听就晓得是一直吃个朋友，实际浪面孔就勿像。有辰光排队排上去，一笼馒头卖光了，只好等，里向菜馒头个麻油味道飘出来，外头是西北风吹进去，人就立了风味当中。

后来馒头勿稀奇了，光明邨又起过一只蓬头。现在80后个小朋友小辰光老有可能来过，是伊拉阿爷阿娘外公外婆领得来，就是为了一只“一口鲜”。想得起来哦？是豆腐衣包起来，里向有肉丝金针菇咾啥，面拖油氽个。基本浪是大人带了小朋友排队，买一只，大人勿吃小人吃。一口鲜味道勿错，不过添拖得来，地浪向一天世界个油污，当初还呒没环保意识，所以一口鲜个排队一点勿输拨现在个光明邨熟食。

再后来倒是清爽了，光明邨有过老落魄个年代——开过麦当劳，还开过“真丝大王”。到了熟食时代，光明邨像是台湾歌手黄小琥，又红起来了，“爱呒没介简单”，一记头就唱到了“排队呒没介简单”。有辰光看到光明邨玻璃房里堆了老高个鸭翅膀，我会想到另外一支歌歌词：“我晓得，我一直有双隐形个翅膀，带我飞，拨我希望。”哈哈，想得忒远了。

实际浪，勒鲁班路浪，有光明邨个配售中心，熟食侪是埃面送出来个。叫是叫中心，就呒没啥人排队，搿就是上海人个人来疯了，也是蛮可爱个。不过，后首来，有光明邨领导告诉我，淮海路光明邨个熟食是自家做个，鲁班路配售中心侪是配拨其他门店个。人来疯也就值得了。

光明邨大酒店个生意也是好得来“勿去讲伊”了，基本上成了中老年校友会个集散中心。包房要提前几只号头预订，大堂散席也是一桌难求。我去过几趟，最大个感受是，吃好饭回转去，喉咙哑脱了。男高音进去，沙喉咙出来。因为大堂吃饭个朋友侪是高分贝，像喊口号一样讲讲当年讲勿出口个悄悄话。

除脱熟食，还有鲜肉月饼，据说要排五六个钟头个队，居然还有黄牛。中老年吃客是勿会睬黄牛，排排队、讲讲闲话，发发微信，一歇歇几只钟头就过脱了。

除脱侬勿晓得个光明邨个伊眼事体，马尚龙勒新书《上海路数》里向，还有交关，连得上海人也侪呒没摸清个路数，万体馆生于“万”时代、上海个“克里姆林宫”、大场与大肠、老虎窗……